Kim Chiu on non-stop bashing after “classroom” quote: “Ang daming perfect sa pinas!”

Kim Chiu replies to bashers who insult her intelligence

Ayaw pa ring tantanan ng bashers si Kim Chiu, 30.

Ito ay pagkatapos ng viral “classroom” quote niya sa virtual discussion kasama ang kapwa ABS-CBN stars noong nakaraang linggo.

Sa #LabanKapamilya Facebook Live noong May 8, Biyernes, naglabas ng hinaing ang Kapamilya stars kaugnay ng Cease and Desist Order ng National Telecommunications Commission (NTC) sa ABS-CBN.

Kabilang sa mga nagsalita sina Coco Martin, Judy Ann Santos, Cherry Pie Picache, at si Kim.

Nang magsalita si Kim, inihambing niya ang pagpapasara ng NTC sa ABS-CBN sa isang scenario sa classroom.

Pero naging masalimuot ang paliwanag ni Kim.

Inako naman ng aktres ang pagkakamali, at humingi ng paumanhin sa pamamagitan ng Instagram post kinabukasan, May 9.

“Hindi ko din naintindihan,” walang kaarte-arteng sinabi nito.

Pero sige pa rin ang ilang netizens sa pagbatikos kay Kim.

Ginawa pa nilang katatawanan ang pagkakamali nito at minaliit ang kanyang kakayahan.

KIM DEFENDS HERSELF

Hindi rin naman nagpaawat si Kim at sinagot ang pambu-bully ng netizens.

Noong Sabado, May 9, nag-post ang aktres ng kanyang workout video sa YouTube.

Sinunggaban ng bashers ang pagkakataon para laitin at murahin uli si Kim sa comments section.

May isa pa ngang sinabing magka-COVID-19 sana siya.

Sabi naman ng isang basher, i-workout daw ni Kim ang kanyang utak.

Sa kabila ng mga low blows, naging mahinahon sa pagsagot ang aktres.

Aniya, “Grabe naman ate! Inaano po kita para nag mura ka ng ganyan???!!! Grabe ka naman po!

“Sinaktan ba kita?!!! Para magsalita ka ng ganyan! Grabe ka naman!!!

“Preno preno din!”

May isa namang pinagtawanan si Kim, at sinabing umimpis na ang utak nito sa kaka-workout.

Matino pa rin itong sinagot ng aktres, bagamat mararamdamang may galit na sa tono nito.

Sabi ni Kim, “Sa dami ng sinabi ko! Dalawang oras kami nag sasalita duon! Yun lang na pick up mo?!!

“Mas low ka pala sakin eh!

“Ikaka proud ba ng nanay mo yung sinabi mo?!”

KIM SURPRISED BY MEANNESS OF OTHERS

May mga netizens ding pumanig at nagtanggol kay Kim.

Paalala ng isang netizen, huwag na lang pansinin ni Kim ang pamba-bash dahil sadyang may mga taong pagkakamali ng iba ang hinahanap.

Pagsang-ayon ni Kim: “I think so. Kasiyahan nila manira ng kapwa tao. Grabe sila.

“Ikinayaman ba nila manira ng kapwa?

“Kung ikakayaman nila edi go. Kung hindi why waste your time? To hurt someone?”

May isa namang nagkomento na masyadong mataas ang tingin ng iba sa sarili.

Sagot ni Kim: “Exactly!!!!! Ang daming perfect sa pinas! [clapping hands emojis]”

Nabanggit din ni Kim na hindi niya inasahan ang sobrang meanness ng ibang tao.

Anito: “didnt expect people can be this mean. Parang bakit sila galit na galit?

“Inano ko ba sila?… sinaktan ko ba?

“May pinatay ba akong kamag anak niya? This people are being so mean. Grabe lang.”

KIM FIRES BACK

Pinatunayan ni Kim na kaya rin niyang makipagsabayan sa pamimilosopo at pang-aasar.

Sabi ng isang basher, sa susunod daw ay talakayin ni Kim ang pagkakaiba ng “law and rule”

Pananabla ni Kim: “Ikaw na lang kaya since naisip mo yan?!! Try mo!”

Huwag na raw siyang mag-Ingles sa susunod.

Banat ng aktres: “Eh gusto ko! Bakit anong problema?

“Marunong naman ako kahit papano! Bakit ka nanood?

“Baka hindi mo kasi naintindihan!!!!! [sticking out tongue emoji]”

Isang female netizen ang nagpayong magbasa si Kim at hindi lang pagpapaganda ng mukha at katawan ang atupagin.

Resbak ni Kim: “Try mo din kaya tanggalin filters sa mga pictures mo! Puro ka filter eh! [laughing, peace sign emojis] peace!!”

Banat ng isa pa: “Nakaka talino ba mag work out kim?”

Sagot ni Kim: “Yes!!!!!”