Kumakalat na last will and testament ng ina, pinalagan ng anak ni Gloria Romero

Photo courtesy: via PEP/FB

Ibahagi
Inalmahan ng pamilya ng pumanaw na batikang Philippine movie icon na si Gloria Romero ang mga nagkalat na pekeng art card ng umano’y last will and testament ng huli.

Ayon sa panayam ng TV5 showbiz news reporter na si MJ Marfori sa anak ni Gloria na si Maritess Gutierrez, nakiusap siya sa gumawa at nagpapakalat nito na igalang ang panahon ng kanilang pagluluksa, at maaari siyang magsagawa ng legal na hakbang sa mga susunod na araw kaugnay nito.

Batay sa ulat ng Philippine Entertainment Portal o PEP, kine-claim ng pamilya ni Gloria na walang katotohanan, walang basehan, at walang ebidensya ang nabanggit na last will and testament.

Kung titingnan ang laman ng art card na nagpapakita ng gawa-gawang detalye sa assets ni Gloria, makikitang ang cash daw niya sa bangko ay umabot sa ₱717,908,554, at ang mansyon naman daw ay nagkakahalagang ₱19,167,242.

40% pa nga raw sa mga naiwang yaman ng batikang aktres ay mapupunta sa pagpapatayo ng isang provincial high school sa Pangasinan.

30% naman daw ay mapupunta sa tatlong charity institutions na hindi niya binanggit ang pangalan.

May tig-15% naman daw ang kaniyang anak na si Maritess at apong si Christopher Juno Balbin.

Pero mismong kay Maritess na galing na hindi totoo ang ipinakakalat na pekeng impormasyong ito, at sa mga susunod na araw, ay baka magsampa na siya ng reklamo tungkol dito.

Naging emosyunal si Maritess sa kaniyang mensahe at tribute sa ina, sa isinagawang eulogy noong Martes ng gabi, Enero 28.

“Tapos na ang role ng Mama ko here on Earth, off and on camera… Sabi ni direk, the great Jesus Christ, Our Lord and Savior — ‘Pack up na, iha, pack up na tayo rito sa Earth, come with me up here. This is a good place,'” emosyunal na pahayag ni Maritess.