Bukod sa issue na buntis daw si Marian Rivera, isa pang ikinaiyak ng aktres ay ang matawag siyang “plastikada” ng isang veteran writer sa mismong presscon ng Desperadas 2 ng Regal Entertainment at GMA Films kahapon, December 15.

Kadarating lang ni Marian at kauupo lang niya sa presidential table nang bigla siyang sabihan ng “platikada” ng naturang reporter. Nagulat si Marian at doon pa lang ay napansin na naming mangiyak-ngiyak ito. Pero mas napaiyak si Marian sa naging reaction ni Karylle sa The Buzz nang tanungin ang ex-girlfriend ni Dingdong Dantes kung totoong buntis si Marian.

Ang issue raw ni Marian at ng veteran writer, ayon sa aming source ay nag-ugat sa isang kaibigan ng veteran writer na nagkuwentong may negatibong experience kay Marian.

Anyway, imbes nga na maging jolly ang atmosphere ng Desperadas 2 presscon ay nauwi ito sa pag-iyak.

IZA BREAKS OFF. Bukod kay Marian, muntik na ring maiyak si Iza Calzado dahil inamin na rin nito na tapos na ang relasyon nila ng kanyang non-showbiz boyfriend na si Jerry Garcia.

Five years ding tumagal ang relasyon ni Iza at ng kanyang investment banker boyfriend na taga-California. Sa pagkakaalam namin ay childhood sweethearts ang dalawa at noong 2003 lang ulit nila natagpuan ang isa’t isa at nagkatuluyan nga sila.

Ayaw nang magbigay ng anumang pahayag si Iza tungkol sa kanyang pakikipag-break sa boyfriend. Hindi raw tama na pag-usapan ‘yon dahil hindi naman daw artista si Jerry. Nangako si Iza na magsasalita siya kapag nasa tamang oras na. Ngayon daw kasi ay gusto niyang mag-concentrate sa promo ng kanilang pelikula.

Nabanggit ni Iza na parating nasa bansa ang kanyang ex-boyfriend dahil may mga aasikasuhin ito rito. Walang nabanggit si Iza na sasalubungin niya sa airport ang kanyang ex-bf.

Nang makausap ng PEP (Philippine Entertainment Portal) ang ama ni Iza na si Lito Calzado, obvious na ayaw rin nitong magbigay ng detalye tungkol sa breakup ng dalawa. Nasabi lang nito na hindi pa raw sila nag-uusap ni Iza tungkol doon. Nagulat din daw siya nang magsalita si Iza na hiwalay na sila ni Jerry.

Close ang ama ni Iza kay Jerry at manghihinayang daw siya kung tuluyan nang mababalewala ang limang taon na relasyon nila.

“Mag-uusap pa kami ni Iza. Wala pa siyang nababanggit talaga sa akin. I’m shocked kasi very open naman sa akin ang batang ‘yan. Ngayon ko lang talaga nalaman. Magsasabi naman ‘yan sa akin, e,” diin ni Tito Lito.

Wish lang ng ama ni Iza na maging masaya parati ang kanyang anak at huwag itong bibitaw sa mga magagandang ginagawa niya.

“I know my daughter will make the right decision. Ang gusto ko lang ay maging masaya siya parati. Ayokong nakikitang malungkot siya. Kakayanin niya ito,” pagwawakas ni Lito.