Cristy Fermin sa mga nadismaya kay Kathryn Bernardo dahil sa balitang nagbe-vape ito: “Role po n’ya ’yon…”

PHOTOS: Cristy Ferminute on YouTube & @misskathrynbernardo on Facebook

Paunawa ni Manay Cristy sa netizens, kung nakunan man daw ng video si Kathryn Bernardo na may hawak na vape, ito ay dahil parte ito ng kanyang character sa ginagawa n’yang pelikula. “Sana nahihiwalay po natin ’yong trabaho sa pagkatao. Role po n’ya ’yon na nagbi-vape s’ya…Hindi po s’ya nagyoyosi. Never! Naku si Kathryn pa,” pahayag n’ya.

To the rescue ang veteran showbiz writer/host and insider na si Cristy Fermin kay Kathryn Bernardo sa balitang nagyoyosi o nagbe-vape umano ang aktres.

Nakunan kasi ng video ang Kapamilya star sa baba ng isang building sa Filinvest City sa Alabang, Muntinlupa City kung saan nagtatrabaho ang netizen na nag-upload nu’n sa TikTok.

Makikita sa video, na kinunan mula sa 10th floor ng building, si Kathryn na nakaupo habang inaayusan ng makeup artist. Kung susuriing mabuti, mukhang BTS o behind the scene ito ng ginagawa n’yang pelikula ngayon na A Very Good Girl. 

Pero ang mas nakatawag ng pansin sa mga netizens ay nang makuhan ang aktres na may hawak na vape o ’yong device na ginagamit na alternative sa pagsisigarilyo. Dahil dito, marami raw na mga tagahangga ng nobya ni Daniel Padilla ang nadismaya.

Kaya naman sa radio and online n’yang Cristy Ferminute kahapon, July 19, dinipensahan ni Manay Cristy si Kathryn.

Aniya, nasundan n’ya ang journey nito mula sa pagiging child star hanggang ngayon na bankable actress na ito kaya alam umano n’ya na hindi totoo ang bali-balitang nagyoyosi o nagbe-vape ito.

“Agad-agad ibinalita na nagyoyosi daw si Kathryn… Nasubaybayan ko po ang kabataan ng batang ito mula nu’ng malinggetong pa s’ya… Malinggetong ha, hanggang ngayon. Never po, never. Hindi po s’ya nagsisigarilyo,” pahayag ni Manay Cristy.

Mas may katotohanan pa umano ang balitang umiinom ang aktres occasionally kesa sa pagso-smoke.

“’Yong ano lang, painum-inom kapag merong okasyon. Umiinom naman s’ya. Pero never ko s’ya nakita o ninuman na nagyoyosi,” lahad pa ng beteranang showbiz insider.

“One time, totoo ’yon, sa sobrang pag-inom nakalimutan n’ya ang bag n’ya kung saan n’ya inilagay. Hahaha! Hanap s’ya nang hanap. Pero ’yong pagyoyosi? Malayo sa katotohanan,” dagdag pa n’ya.

Paunawa pa ni Manay Cristy sa netizens, kung nakunan man daw ng video si Kathryn na may hawak na vape, ito marahil ay parte ng kanyang character sa ginagawa n’yang pelikula.

“Sana nahihiwalay po natin ’yong trabaho sa pagkatao. Role po n’ya ’yon na nagbi-vape s’ya. Ganu’n, gumagamit s’ya ng vape [dahil sa role n’ya]. Hindi po s’ya nagyoyosi. Never! Naku si Kathryn pa,” pagtatapos n’ya.