Mahigit isang taon ang lumipas matapos pumutok ang isyu tungkol kina Gerald Anderson, Bea Alonzo, at Julia Barretto, hindi pa rin tinatantanan ng mga intriga ang mga ito na may kaugnay sa kinasangkutan nilang isyu.

Kamakailan nga lang, isang tanong ang ibinato sa aktor na si Gerald tungkol sa umano’y totoong relasyon nito kay Julia.

Nangyari ito noong humarap si Gerald sa isang press conference para sa bagong proyekto nito kasama si Arci Munoz. Dito, isa sa mga reporter na naroroon ang matapag na tinanong ang aktor tungkol sa totoo umanong namagitan o namamagitan sa kanila ni Julia.

Dagdag pa ng reporter, kapag hindi raw kasi tuluyang kinlaro ni Gerald ang tungkol sa bagay na ito, patuloy lamang umano na magbabato rito ng mga spekulasyon ang publiko at mas lalong hindi sila tatantanan ng mga intriga.

“The more that you are silent about it, the more that chismosos and chismosas are insisting about it. Paki-unlock mo nga iyang love rumors na iyan once and for all,” ani pa ng naturang reporter kay Gerald.

Napatawa na lamang umano ang aktor dahil sa tanong na ito sa kanya. Nagbiro pa nga umano ito sa naturang reporter na matapang na nagbato sa kanya ng naturang tanong.

Ngunit, hindi pa rin diretsahang sinagot ni Gerald ang tanong na ito sa kanya. Ani ni Gerald, hindi naman daw kasi dapat na pag-usapan ang mga taong hindi naman bahagi ng proyekto na kanilang ipinopromote doon ni Arci.

Dagdag pa ni Gerald, respeto na rin umano ito para sa taong kaugnay ng naturang tanong. Pahayag pa ng aktor,

“Ang ganda ng segue ha!

“Siguro unang-una, ayoko na rin pag-usapan ang isang taong wala naman din dito, walang koneksiyon sa ginagawa natin ngayon. Respeto na rin po siguro sa kanila. Labas po tayo diyan.”

Sa kabila ng patuloy na pagbabato sa aktor ng tanong tungkol dito, mas pinili pa rin ni Gerald na manahimik at respetuhin ang panig ng iba pang artista na nasangkot din sa naturang isyu.

Kaugnay nito, maliban kay Gerald, si Julia rin mismo ay madalas din na binibigyan ng tanong tungkol sa naturang kontrobersiya na kanyang kinasangkutan.

Hindi maikakaila na hindi naging maganda ang mga salitang binitawan ng publiko nang mga panahong iyon kay Julia kaya naman, minsan itong tinanong kung paano niya umano nalampasan ang bahaging iyon ng kanyang buhay.

Para kay Julia, ipinagpatuloy lamang umano niya ang buhay dahil alam niyang may mga mas mabubuting bagay pa na darating sa kanya.

Kung matatandaan, napakalaking kontrobersiya noon sa showbiz ang isyu tungkol sa pagigng bahagi umano ni Julia sa naganap na hiwalayan nina Bea at Gerald. Parehong inulan noon ng mga batikos sina Julia at Gerald mula sa publiko at sinubaybayan rin ng mga ito ang mga pangyayari sa naturang kontrobersiya.

Isang taon matapos nito, bagama’t hindi pa rin malinaw kung ano ang totoong nangyari ay mukhang nag-iba na ang ihip ng hangin para sa tatlong artista na sangkot sa isyu.