KC Concepcion, ‘di raw nasaktan sa naging pahayag ni Paulo Avelino — PEP

Matipid at maingat na nagbigay ng ilang pahayag si KC Concepcion tungkol sa napabalitang breakup nila ni Paulo Avelino. Ito’y kahit na walang opisyal na pahayag na ibinigay ang dalawa na nagkaroon nga sila ng romantikong ugnayan.

Sa ulat nitong Huwebes, sinabing eksklusibong nakapanayam ng Philippine Entertainment Portal si KC sa presscon ng Lukso! Cirque De La Vie show, na inorganisa ng Cameleon Association, sa Discovery Primea Hotel, Makati City.

“Honestly, I’ve come to the point where I realized I would like to keep my love life private,” ani KC. “Ang dami ko na rin kasi sigurong na-share sa public, kasi love ko kayo. Pero siguro for myself, this time, I’d like to keep my love life private. Not just for me but also for the person I’m with.”

Nang tanungin kung ano ang dahilan ng kanilang breakup, medyo natatawang sagot ni KC, “Wala naman.

“Ayoko nang pag-usapan, ‘coz I’m very positive…I’m very happy and I’m happy for my loved ones and hope that they would be happy with their choices in life.”

Matagal nang napabalitang may espesyal na relasyon sina KC at Paulo.

Ngunit walang kumpirmasyon na nagmula sa dalawa, hanggang sa umamin si Paulo na nagkaroon nga sila ng ugnayan ni KC, pero hiwalay na sila.

Pero minsan na ring naitanong kay Paulo kung totoo bang naghiwalay na sila ni KC, at ang isinagot niya, “Wala namang nagbi-break siguro na magkaibigan.”

Sa nakalap na impormasyon ng PEP, umabot ng mahigit isang taon ang relasyon nina KC at Paulo.

Nang tanungin ng PEP si KC kung nasaktan ba siya sa sinabi ni Paulo na wala namang magkaibigang nagbi-break?

Diretsong tugon nito, “Hindi.”

Tungkol sa Cameleon Association, si KC ang “Godmother” ng organisasyon na tumutulong sa mga babaeng naabuso ng kanilang mga kamag-anak.

Nakabase ang foundation sa Iloilo City at layon ng gagawing konsiyerto na makalikom ng pondo para sa pangangailangan ng survivors. Gaganapin ang show sa May 14, sa Newport Performing Arts Theater, sa Resorts World Manila.