Espantaho star Janice de Belen comments on recent issue of ex-husband John Estrada and his estranged wife Priscilla Meirelles (not in photo): “Basta wala akong kinalaman dun. Yun lang. Wala akong kinalaman.”
PHOTO/S: Arniel C. Serato

Walang paliguy-ligoy na sinagot ng aktres na si Janice de Belen ang PEP.ph (Philippine Entertainment Portal) nang hingan namin siya ng komento tungkol sa napapabalitang hiwalayan ng ex-husband niyang si John Estrada at asawa nitong Priscilla Meirelles.

Nagpasantabi muna kami kung maaari siyang tanungin tungkol sa ibang isyu bukod sa pelikulang Espantaho, na kanilang pinu-promote para sa Metro Manila Film Festival (MMFF) 2024.

Pumayag naman si Janice kaya kaagad kaming nagpasalamat.

Ngunit biro niya, “Puwede ko rin namang hindi sagutin, di ba? Huwag ka muna mag-thank you, di ko pa sinasagot.”

Tanong ng PEP.ph kay Janice, “Nung nabasa, nalaman mo na parang naghiwalay na ang ex mo, anong nasabi mo?”

Sagot ni Janice, “Basta wala akong kinalaman dun. Yun lang. Wala akong kinalaman.”

Hindi ba niya nasambit sa sarili na, “Ayan na naman siya?”

Umiiling-iling na sagot ng award-winning TV host and actress, “Not my life. Not my business.”

Nag-reach out ba sa kanya si Priscilla?

Umiling ulit si Janice, sabay sabing, “I don’t… Ayokong… buhay nila yan.”

Eksklusibong nakausap ng PEP.ph si Janice sa dressing room ng Baked Studios sa Makati City, kung saan ginanap ang pictorial para sa Espantaho, kahapon, November 12, 2024.

John ESTRADA SPOTTED WITH A MYSTERY WOMAN AT A BAR CHILLING

Noong November 1, 2024, nag-viral sa social media ang video ni John kasama ang isang mystery woman.

Kaagad itong pinagpasa-pasahan, at samu’t saring komento mula sa netizens ang kaagad ay naglitawan.

May mga nag-isip agad na may bagong babae sa buhay ni John, lalo pa’t nasabi ng aktor sa isang statement noong July 2024 na nagkasundo sila ng asawang si Priscilla “to take a break” sa kanilang marriage.

Makikita sa video na masaya ang aktor at nakaakbay siya sa hindi pa rin nakikilalang babae.

Photo/s: Courtesy: Facebook

Kasunod nito, nagbigay ng maikling pahayag ang aktor ukol sa viral video niya kasama ang isang mystery woman.

Ayon sa kanya, hindi niya kailangang magpaliwanag pa tungkol dito.

Katulad ng normal na tao, may karapatan din siyang makipagkaibigan sa mga taong gusto niyang kaibiganin, mapa-lalaki man o babae.

Ang pagkakaiba nga lang, isa siyang public figure kaya laging napag-uusapan ang mga larawang lumalabas tungkol sa kanya lalo na at babae ang kanyang kasama.

Buong pahayag ni John, “Honestly, I don’t owe anyone an explanation.

“But once and for all, I’m going to say this, I have every right to befriend who I like to be friends with. Male or female.

“Like any normal human being. The only difference is I’m a public figure.”

Cryptic post lamang ang naging sagot ni Priscilla sa panibagong sighting ng estranged husband na si John.

Saad niya sa kanyang Instagram Story noong November 3, 2024, “When someone makes you an option, make them a memory.”