Kapuso comedienne Chariz Solomon gives details about a Bubble Gang male co-star who accused her of sexual harassment in the past. 
PHOTO/S: @chariz_solomon on Instagram

Ikinuwento ni Chariz Solomon, 35, ang tungkol sa naging co-star niya sa Bubble Gang na inakusahan siya ng sexual harassment.

Sa episode ng Lutong Bahay ng GTV noong November 6, 2024, tinanong si Chariz kung sino ang artistang ayaw na niyang makatrabaho.

“At gusto kong sampalin?” sundot ni Chariz, indikasyong ikinagalit niya ang ginawang paratang sa kanya ng dating co-star.

Pinangalanan ni Chariz ang co-star, pero na-bleep ito sa Lutong Bahay episode.

“Kahit hindi niyo i-bleep,” hamon pa niya.

“Hindi na ako galit, pero it was so much for me that time.”

Nang mangyari raw ang akusasyon sa kanya ay one-month pregnant siya sa kanyang panganay na anak.

“Mahabang istorya, pero buntis pa lang ako kay Apollo,” pagtukoy ng Kapuso comedienne sa kanyang panganay na anak na isinilang noong 2013.

Pagpapatuloy niya, “Kasi nga, first time kong nabuntis, di ba, [yung] anxiety dinala mo sa trabaho.”

CHARIZ SOLOMON RECOUNTS THE INCIDENT

Idinetalye ni Chariz kung paano siya inakusahan ng Bubble Gang co-star ng umano’y pangha-harass.

Kuwento ng aktres, “Pareho kaming nasa Bubble noon, pero siya yung regular, ako semi-reg.

“Tapos nag-message siya sa akin. Nag-email siya na sa tingin ko, siya iyon, pero sinasabi niya girlfriend niya.

“Sinabi niya hina-harass ko daw siya… sexually. As in type ko daw siya, ganon.”

Nagmuwestra si Chariz na nagulat siya sa paratang sa kanya .

“So, ako naman, ‘Shucks!’ Hindi ko talaga siya type, to be honest.”

Chariz Solomon gives details about Bubble Gang co-star who allegedly accused her of sexual harassment. 
Photo/s: GMA Public Affairs on YouTube

Hindi na idinetalye ni Chariz kung ano ang ginawa niya sa co-star para akusahan siya ng pangha-harass.

Ang Bubble Gang ang longest-running gag show sa GMA-7, at pumasok dito si Chariz noong 2010.

Nagsimula si Chariz sa GMA-7 nang sumali sa StarStruck: The Next Level noong 2006-2004.

Hindi man nakaabot sa Top 14 si Chariz, pero iyon ang naging daan para kunin siyang talent ng Kapuso Network.

Mas nakilala si Chariz sa kanyang supporting roles sa GMA projects at hanggang ngayon ay aktibo bilang regular cast ng Bubble Gang. Kasali rin siya long-running comedy series na Pepito Manaloto.