Nagpasalamat ang dating child star na si Amy Nobleza kay Unkabogable Star Vice Ganda dahil sa pagtulong nito sa kanya na matapos sa pag-aaral.

Inanunsyo ng dating child actress na si Amy Nobleza na nakapagtapos na siya sa kolehiyo bilang magna cum laude.

Natapos ni Amy ang kanyang degree sa Business Administration major in Marketing Management sa Lyceum of the Philippines University. Sa Instagram, ibinahagi niya ang ilang larawan kasama ang kanyang pamilya at mga video mula sa naganap na graduation ceremony.

Inihayag din ni Amy ang kanyang pasasalamat sa Panginoon, pamilya, mga kaibigan, at mga propesor dahil sa kanilang pagmamahal, patuloy na suporta at paggabay sa kanya.

Nagpasalamat din siya kay Unkabogable Star Vice Ganda dahil sa tulong na binigay nito sa kanya para makapagtapos ng pag-aaral.

“Ginawa ko! Salamat, Panginoon! Naging posible ang lahat dahil sa suporta at tiwala ng mga tao sa paligid ko. Pinasasalamatan ko ang aking pamilya sa kanilang pagmamahal at walang tigil na suporta; aking mga kaklase para sa ating mga hindi malilimutang sandali, gabi, at hindi mabilang na mga kape; Ang Team Amy at ang aking mga kaibigan na sumusuporta sa akin sa aking mga pagsusumikap; aking mga propesor sa kanilang paggabay at sa karunungan na kanilang ibinahagi sa amin; at lalo na sa taong tumulong sa akin na matapos at makamit ito, meme @praybeytbenjamin. Ako ay magpapasalamat magpakailanman sa iyo. Ito ay simula pa lamang. Cheers sa hinaharap!

“Naniniwala siya na kaya niya, kaya ginawa niya,” sulat niya sa caption.

Noong 2019, sumali si Amy sa “Tawag ng Tanghalan” segment ng It’s Showtime at naging emosyonal nang alukin siya ng seasoned comedian-host na tulungan siyang makapagtapos ng kolehiyo.

“Kapag hindi mo kaya ha, magpapa-aral ako sa’yo,” ani ni Vice Ganda kay Amy.

Dagdag pa ng It’s Showtime host, “Mag-usap tayo tutulungan kita to make sure matutuloy ‘yung pag-aaral mo. Kasi nakakahanga ‘yung artista na bata pa lang tapos hindi umalis sa eskuwelahan tapos honor student. Tapusin mo pag-aaral mo para sa akin na hindi nakatapos ng pag-aaral, okay?”

Samantala, patuloy na subaybayan ang It’s Showtime tuwing Lunes hanggang Sabado, 12 noon, sa GMA, GTV, at iba pang Kapuso platforms.