Bago matapos ang eliminations ng 48th Philippine Basketball Association 2023-24 Commissioner’s Cup, inaasahang makakabalik na si June Mar Fajardo sa San Miguel Beer.

Posibleng sa huling laro ng Beer sa Jan. 12 kontra Blackwater ay maglaro na ang seven-time MVP.

Sa Jan. 7 ay uunahin ng SMB ang Terrafirma.

Tatasahan kontra Bossing kung fully recovered na mula left wrist injury si June Mar. Nabalian siya noon pang Nov. 30 kontra Rain or Shine at hindi na nakalaro sa huling limang salang.

Nakabenda pa ang kamay ng 6-foot-10 center kapag pumupunta sa game venues tuwing may laro ang kanyang team.

Makalipas ang higit isang buwan ay positibo ang team na makakalaro na ang Cebuano slotman.

Nakatatlong sunod na panalo ang San Miguel, sa kasalukuyan ay 6-3 at kabuhol ang Ginebra sa 4th-5th. Pasok na ang dalawa sa eight-team quarterfinals pagkatapos ng 11-game elims, naggigitgitan sa top four na twice-to-beat sa next round.

Nasa unahan nila ang Magnolia (9-1), Phoenix (7-2) at Meralco (6-2).

Si Bennie Boatwright na ang import ng SMB kapalit ni Ivan Aska, makakatambal ni Fajardo sa loob.

Nakabalik na din mula knee injury si Terrence Romeo. (Vladi Eduarte)