KathDen nagkakainan sa kuwarto

Napuno ng tawanan sa Dolphy Theater habang ginaganap ang grand mediacon ng much-awaited reunion film nina Kathryn Bernardo at Alden Richards na “Hello, Love Again” .

Ito’y dahil sa rebelasyon ng direktor na si Cathy Garcia-Sampana tungkol sa KathDen.

Natanong kasi ang box-office director kung kumusta naman ang chemistry ng KathDen dito sa HLA at inamin niyang medyo nahirapan nga raw siya.

“Medyo humirap. Kasi, sinabihan mo, ‘wag mag-usap, pagtingin ko, nagkakainan talaga du’n sa kwarto. Kainis,” pagbubuking ni direk Cathy.

Nagtawanan sina Alden at Kathrine at si direk naman, na-realize agad na parang ang pangit ng ginamit niyang word na ‘nagkakainan.

“Ay, ang pangit ng ‘nagkakainan,’ sorry, sorry,” sey niya.

Hagalpakan ng tawa ang lahat kabilang na ang KathDen.

“Erase! Kasi ako, ang linis ng isip ko. Kayo, ang dumi n’yo!” natatawang paliwanag ni direk Cathy.

Dagdag na explanation naman ni Alden, “dinner break ‘yun, dinner break.”

Ipinaliwanag din ni direk na mabigat daw ang eksenang kukunan that day na emotional scenes nina Kathryn and Alden na inabot daw ng 7 hours.“So, ang talagang instruction ko, walang kakausap kay RJ, kay Alden. Tapos, si Kath naman, in fairness, hindi naman niya kinakausap except nun’g break, pagdaan ko, nasa sahig, kumakain sila ng adobo yata or something,” tsika ni direk.

Kinorek naman ng KathDen na lechon kawali raw ‘yun.

Patuloy ni direk, “iniisip ko, magagalit ba ako? Sige, regalo ko na lang sa dalawa na may makausap kasi 7 oras na nga silang puro. . . talagang sobrang makabagbag-damdamin.”

Kaya naman pinagbigyan na lang daw niya ang dalawa at hindi na lang niya pinagalitan.Pero puring-puri ni direk ang KathDen dahil lahat daw ng hiningi niya para sa pelikula ay nagampanan ng dalawa, gayundin ang support at tiwala ng mga ito sa isa’t isa.

Plus nag-mature na rin daw talaga ang dalawa simula nang una niyang idirek sa ‘Hello, Love, Goodbye ‘ 5 years ago.

Ang HLA ay mapapanood na sa sinehan sa Nov. 13 at inanunsyo rin na first time na magkakaroon sa sinehan ng midnight screenings na magsisimula ng 12:01 am. Bukod dito ay ipalalabas din ang pelikula sa iba’t ibang bansa, also this November.