CEBU, Philippines —  Gitug-an ni Gilas Pilipinas coach Yeng Guiao nga adunay gihambin nga pagsakit sa tiil si JuneMar Fajardo ug maoy hinungdan  nga wala kaayo kini makapakita og nindot nga performance sa  unang nilang duwa sa FIBA World Cup didto sa China.

Si Guiao mibutyag niini tungod sa mga kritiko nga misaway ni Fajardo nga igo lang nakahimo og nuybe puntos alang sa Gilas sa una nilang duwa batok Italy niadtong Sabado sa gabii. “Meron syang slight sprain pero playable naman sya,” matud pa ni Guiao sa Spin.ph.

Ang 6-foot-10 nga si Fajardo nangayo sa pagsabot tungod kay dili siya siyento porsiyento, apan giklaro niya nga dili siya molingkod sa mga nahibiling duwa sa national team.

Gipapahuway hinuon ni Guiao si Fajardo niadtong Domingo sa gabii atol sa team practice sa Gilas pangandam sa Serbia nga kasamtangang nagduwa sa pagsulat niini kagabii.

Wala giklaro ni Fajardo kon asa gikan iyang injury, apan gituohan nga nagsakit na iyang tiil niadto pang miaging bulan atol sa PBA Commissioner’s Cup finals diin midaog ang iyang koponan San Miguel Beermen batok sa TNT KaTropa.

Si Fajardo usa sa mga sinaligang bigmen sa Gilas Pilipinas uban ni Andray Blatche, Japeth Aguilar ug  Raymond Almazan.