Vice Ganda takes off wig anew on It’s Showtime

Vice: “Hindi na rin ako affected sa mga pangit na pangit sa akin kapag walang wig.”

It’s Showtime host Vice Ganda takes off his wig on national television to express support to an “EXpecially For You” searcher who lost her hair due to alopecia.
PHOTO/S: Screengrab @GMA Network YouTube

Hindi napigilang maging emosyonal ng TV host-comedian na si Vice Ganda nang tanggalin niya ang kanyang wig habang live silang umeere sa It’s Showtime nitong Biyernes, July 19, 2024.

Nangyari ito sa segment na “EXpecially For You,” kunsaan ang searcher na nagngangalang April ay may alopecia.

Ayon sa medico.ph, ang alopecia ay isang kondisyon kung saan nagkakaroon ng paglalagas ng buhok o pangangalbo.

Ang mga may alopecia ay hindi lamang buhok sa ulo ang maaaring mangalbo, kung hindi pati na rin ang buhok sa buong katawan.

Kuwento ni April, dahil sa kanyang sakit ay nawalan siya ng kumpiyansa sa sarili, dahilan na rin para makipaghiwalay siya sa dati niyang boyfriend na si Andrei.

Saad niya, “Wala akong hair. Naka-wig lang ako. Nagkakaroon ako ng insecurity. Baka mas deserve niya yung ibang babae na hindi siya pahihirapan pa.

“Sobrang laking impact ng insecurity ng pagkatao ko po nitong sakit ko.

“Parang ang baba ko po, ayun yung tingin ko sa sarili ko. Mababa po kasi sa sobrang dami kong problem, tapos ganito pa ako.”

VICE GANDA SHARES own experiences with insecurity

Para palakasin ang loob ni April ay ibinahagi ni Vice ang kanyang karanasan nang magsimula siyang malagasan ng buhok dahil sa stress.

Pagbabahagi ng It’s Showtime host: “Noong nalalagasan na rin ako ng buhok sa stress, sobra yung insecurity ko at malayo yun sa pinagdaanan niya [April].

“Ang tagal nung journey ko sa acceptance na, ‘Ang pangit na ng buhok ko, maookray ako nito.’ Kasi. di ba, kapag bakla ka gusto mong maganda buhok mo. Pero [biglang] bakla ka pero mataas hairline mo.

“Parehas tayong naka-wig [April].

“At gusto ko lang sabihin na hindi lahat ng nagsusuot ng wig gusto lang umawra o lumandi or for aesthetic purposes lang.

“Maraming oras ang itinatawid ng pagwi-wig namin. Iniraraos kami ng pagwi-wig namin, because this wig gives us power.

“This gives us strength and hope and energy. Hindi kami nagwi-wig para umarte.”

Para pagaanin ang emosyunal nang sitwasyon ay nagbiro sina Jhong Hilario at Vhong Navarro na ipakita ni Vice ang totoo niyang buhok.

Bagay na hindi naman inurungan ni Vice.

Aniya: “Kung makakatulong ito para makakuha ng kahit katiting na kumpiyansa si April, why not?

“Ang tagal na panahon na takot ako dito na magpakita na walang wig, ngayon nasa punto na ako nang wala na akong pake. Meron nang taong mahal na mahal ako kahit wala akong wig.

“Hindi na rin ako affected sa mga pangit na pangit sa akin kapag walang wig.

“May wig o wala, may nagmamahal dito, ‘no.

“May wig o wala, may tumatanggap dito.

“Bukod kay Ion [Perez, Vice’s partner], mahal ako ng nanay ko, mahal ako ng mga kapatid ko, mahal ako ng pamilya ko, at mahal ako ni Lord.”

Photo/s: Screengrab @GMA Network YouTube

Matapos magtanggal ng wig ay bumuhos ang luha ni Vice nang yakapin siya nang mahigpit ni April bilang pasasalamat sa katatagan at lakas ng loob na ibinigay na rito.

Habang nakayakap, patuloy ang pagbulong Vice kay April ng, “Wag kang magmadali. In your time.

“This is not for me [but] for people like you.”

Photo/s: Screengrab @GMA Network YouTube

Maging ang mga co-host niyang sina Jhong, Vhong, at Kim Chiu ay hindi na rin napigilang maging emosyonal nang makita sina Vice at April na nag-iiyakan habang nagyayakapan.

Vice Ganda’s “hair story” wins Magpasikat 2019

Hindi ito ang unang beses na ibinahagi at ipinakita ni Vice on live television ang kanyang hitsura na walang suot-suot na wig.

ADVERTISEMENT – CONTINUE READING BELOW ↓

Noong 2019, sa “Magpasikat” para sa 10th anniversary celebration ng It’s Showtime, ay nagtanggal na rin si Vice ng wig habang nagpe-perform kasama ang mga may sakit na alopecia.

Dahil sa kirot sa puso at makabagbag- damdamin niyang performance, si Vice ang hinirang na grand champion sa “Magpasikat 2019.”