Sinagot ng mag-asawang Dingdong Dantes at Marian Rivera ang tanong kung nagpaplano na ba silang magka-third baby ngayong one year old na ang bunso nilang si Baby Sixto.

Sa Facebook live ng Regal Entertainment Inc., ngayong araw, May 1, para sa introduction ng free screening ng kanilang movie na You To Me Are Everything, pinaunlakan ng mag-asawang DongYan na sagutin ang mga tanong mula sa kanilang mga fans.

Na-pokus ang discussion about family ng Isa sa mga fans ang humingi ng karagdagang explanation mula sa 39-year-old actor sa inspiring message n’ya sa anak na si Baby Sixto noong nag-celebrate ito ng kanyang first birthday last April 16.

Paliwang ng Big Boss sa Descendants of the Sun PH, na-inspire daw kasi siya nang ma-witness niya first hand ang unang paglalakad ng anak, na nataon namang naganap habang naka-ECQ sila.

“Ako mismo na-inspire sa kanya dahil isang araw nakita ko na lang s’ya biglang tumayo at naglakad,” kwento ni Dingdong. “Kasi nung nag-umpisa ang enhanced community quarantine gumagapang pa lang ‘yan eh. Tapos ngayon tumatakbo na. Imagine ‘yong ganung milestone ay nasaksihan ko at nandito ako.”

Dagdag pa ng Kapuso Primetime King, sa kabila ng inspirasyon na nakuha n’ya sa kanyang anak ay nakakaramdam din s’ya ng takot para rito.

“Pero looking forward alam ko na kung anong klaseng mundo ang pupuntahan nya, ‘di ba, post-COVID? So natatakot ako para sa lahat, lalong lalo na sa mga anak na natin and the next generation.

“And at the same time, alam kong may hope dahil hindi naman sila ibibihay sa atin ng Panginoon nang walang dahilan. I know that ‘yong henerasyon nila ang magre-reap ng benefits ng mga gagawin natin ngayon. Dapat e ayusin na talaga natin ang mundo para sa kanila.”

Nai-share din ni Marian ang favorite bonding nilang mag-anak ngayong may umiiral na lockdown.

“Marami eh. Si Sixto bilang isang taon pa lang medyo minimal lang,” paglalahad ni Marian. “Gustong-gusto namin kapag nasa room, nandun kami lahat, nagrarambulan kami. Ang ginawa ko kasi, nilagyan ko lahat ng unan lahat ng paligid kasi napaka-likot ni Sixto. Para kung ano mang gawin n’ya—bumali-baliktad s’ya, nandun kami lahat. Hindi kami nag-aalala. Tapos nanonood kami ng movie. Ayon. Ganun kami. Kain. Movie.”

Matami rin umano silang home-school sessions ni Zia, ani Marian, dahil nami-miss na raw ng kanilang panganay ang pumasok sa school.

Nanlaki naman ang mata ng Kapuso Primetime Queen sa tanong kung may plano na ba silang dagdagan ang kanilang anak tutal ay one-year old na si Sixto.

Nakatatawa s’yang sumagot at sinabing, “Well sa panahon ngayon parang napaka… hindi ko alam. Ang mahalaga nad’yan si Sixto at si Zia. Doon na muna kami magpo-fous na dalawa.”

By the way, ang You To Me Are Everything ay ang romantic comedy film na pinagbidahan ng Kapuso Royal Couple way back 2010.

Ayon pa kay Dong, itinuturing nila na mahalaga ang pelikulang ito dahil “isang chapter s’ya sa love story namin nung nag-uumpisa kami.”